بعد قراءة هذا المنشور، راح تفهم علاش بزاف ناس يقولك راهم ينحولي 300دج/150دج/450دج بدون سبب، لكن راح نعطيك واحد من الأسباب.
في منشورات سابقة تطرقت لمعنى النجمة (*) لي تظهر قدّام بعض العمليات في كشف حسابك على موقع ECCP، واللي معناها أنّ العملية مازالت في طور التصديق "Opération en instance de validation"، يعني المبلغ مزال ما دخلش فعليًا في رصيدك القابل للاستعمال.
تفصيل مبسط لمعنى النجمة (*) في ECCP :
- كي تشوف مبلغ داخل لحسابك ومعاه نجمة (*) فهذيك المعاملة في طور المصادقة، النظام سجّلها لكن ما زال ما تأكّدتش نهائيًا.
- بعد ما يتم التصديق، النجمة (*) تروح، وفي ذاك الوقت المبلغ يولي جزء حقيقي من رصيدك وتقدر تعتمد عليه في العمليات.
مثال: تحويل بعد التاسعة ليلاً :
- لنفترض رصيدك 0 دج، وبعثولك 1000 دج بعد التاسعة ليلاً (خارج أوقات معالجة النظام اليومية)، راح تشوف 1000 دج قدّامها نجمة (*).
- إذا في نفس الليل درت فليكسي بهذيك 1000 دج، العملية تمرّ عادي ويصلك الفليكسي، لأن النظام يسمح تقنيًا بتنفيذها حتى لو المبلغ مازال "قيد التصديق".
كيفاش يحسبها النظام (محاسبيًا) :
- العمليات اللي تتسجّل بعد وقت معيّن في اليوم (مثلًا بعد 21:00) يتم تسويتها والمصادقة عليها في الدفعة المحاسبية تاع الليلة الموالية.
- كي يجي النظام يدير المحاسبة، يلقاك استعملت 1000 دج في وقت كان الرصيد الرسمي ما يزال 0 دج، فيعتبر العملية كما لو تمت "بدون رصيد" في لحظة التنفيذ.
نصيحة لتفادي مشكل "ضريبة بدون رصيد" :
- إذا دخلولك دراهم بعد التاسعة ليلاً، وخاصةً إذا كان رصيدك من قبل صفر دينار، من الأفضل ما تدير حتى عملية (فليكسي، تحويل، شراء...) حتى تروح النجمة (*) وتولي العملية مصادَق عليها نهائيًا.
- بهذه الطريقة تضمن باللي رصيدك فعلي، وتتجنّب أي ضريبة أو مشاكل محتملة مرتبطة بعمليات محسوبة "بدون رصيد" في النظام المحاسبي.
وماتنساش تقول للناس بلي مكاش منها بريد الجزائر يعيطلك يقولك درك يلحقك كود امليه عليا!
ربي يحفظ الجميع والسلام عليكم ورحمة الله وبركاته.