كيفية ملئ استمارة KYC لبريد الجزائر
الدليل النهائي لملء استمارة KYC.. خطوة بخطوة وبدون أي خطأ! 🚨✅
الكثير من ناس دخلوا للموقع وتخلطتلهم الأمور، خاصة في ”العنوان” و”المهنة“. اليوم راح نفككوا الاستمارة قطعة قطعة، ونبدوا من الصفر.
🛠️ الخطوة 1: كيفاش تدخل لحسابك ECCP؟
قبل كلش، لازم يكون عندك حساب في موقع البريد:
— عندك البطاقة الذهبية؟ (أسهل طريقة): سجل في الموقع برقم البطاقة ورقم الهاتف المربوط بها، يوصلك كود (4 أرقام) في ميساج، ومبروك عليك.
— ما عندكش البطاقة؟ (الطريقة الكلاسيكية): نزل لأسفل صفحة التسجيل، تيليشارجي "استمارة التسجيل" (Formulaire)، عمرها بيدك وديها لأقرب مركز بريد، هوما يمدولك "الرقم السري" (Mot de passe).
📍 الخطوة 2: وين نلقى KYC؟
كي تدخل لحسابك:
◾ ممكن يخرجلك إشعار (Pop-up) مباشرة.
◾إذا ما خرجش: اضغط على القائمة (3 شرطات ☰) في اليمين.
◾اختر ”معلومات الحساب” (Infos Compte).
◾انزل للأسفل تلقى زر ”KYC“.
📝 الخطوة 3: ملء المعلومات (الصح هنا!):
1️⃣ المعلومات الشخصية:
الاسم واللقب، بالعربية واللاتينية/الفرنسية.
رقم التعريف الوطني (NIN): هنا ركز! اكتب الرقم الطويل الموجود في بطاقة التعريف البيومترية المتكون من 19 رقم.
اسم الأب و اسم الأم واللقب، بالأحرف اللاتينية.
2️⃣ العنوان، الفخ الكبير!: 🏠⚠️
بزاف يكتبوا عنوان دارهم الحالي، والسيستيم يرفض!
– القاعدة: لازم تكتب الولاية والبلدية والرمز البريدي وين
فتحت الحساب تاعك أول مرة.
– كيفاش نعرف؟ اجبد الشيك (Chèque)، تلقى العنوان والرمز البريدي مطبوعين تما. نقلهم كيما راهم.
3️⃣ الوضعية المهنية: 👔
هنا القائمة وتتغير حسب اختيارك:
◾إذا اخترت ”موظف/أجير” (Salarié): راح تتفتحلك خانات إجبارية (المهنة، اسم المؤسسة، عنوان العمل، قطاع النشاط). لازم تعمرهم.
◾إذا اخترت ”طالب / متقاعد / غير موظف”: السيستيم يغلق تلقائياً الخانات السابقة (تولي رمادية وما تقدرش تكتب فيها). يعني ما تخلعش، هذا طبيعي لأنك ما عندكش ”مشغل”.
4️⃣ المعلومات المالية: 💰
الدخل الشهري: اكتب شحال تصور في الشهر.
الدخل السنوي المتوقع: اضرب الشهري x 12.
غرض فتح الحساب: دير ”ادخار” (Epargne) أو ”استقبال الراتب” (Salaire).
5️⃣ الخانات الأربعة الأخيرة, شرحناها سابقاً:
(الحد الأقصى، الحد الأدنى، السنوي، المصدر).
هادو شرحناهم بالتفصيل في المنشور السابق، باختصار: ”خلي ديما مساحة أمان Margin واكتب مبالغ أكبر شوية من الواقع باش تكون مهني”.
⚠️ ملاحظة هامة:
هذه المعلومات تنظيمية، وفي المستقبل ممكن منصة ECCP راح توفر خاصية ”التحديث”، يعني إذا بدلت خدمتك أو عنوانك تقدر تعدلها عادي.
#AlgeriePoste #ECCP #KYC #Ramadan2026#بريد_الجزائر #